Hytaý häkimiýetleri internetiň çagalara täsirini hasam çäklendirmek isleýär. Şu maksat bilen internet hyzmatlaryny üpjün edijiler kämillik ýaşyna ýetmedikleriň onlaýn geçirýän wagtyna gözegçilik etmäge mejbur bolup biler.
Kibergiňişlik meseleleri boýunça guramanyň (CAC) kararynyň taslamasy köpçüligiň dykgatyna ýetirildi. Düzgünleşdiriji edara ähli onlaýn oýunlary, audio we wideo mazmunly serwisleri, striming meýdançalaryny we sosial ulgamlary çäklendirmegi teklip edýär. Onlaýn hyzmatlary üpjün edijileriň ählisi çäklendiriji "ýaşlar režimini” goşmaly bolar. Mysal üçin, internet hyzmatlaryny üpjün edijiler kämillik ýaşyna ýetmedikleriň internete sarp edýän wagtyna çäk goýmaly bolarlar, şeýle-de gündelik çykdajylaryň bahasyny we onlaýn söwdanyň iň ýokary bahasyny çäklendirmeli bolarlar. 13-nji aprele çenli häkimiýetler bu başlangyç barada pikirleri kabul eder. Şol bir wagtyň özünde, “South China Morning Post” Hytaýyň Tencent we ByteDance internet ägirtleriniň “ýaşlar režimini” eýýäm girizendigini belleýär. Neşiriň maglumatlaryna görä, bu çäklendirme 18 ýaşa çenli hytaýly internet ulanyjylaryň 180 millionyna täsir edip biler. Taslama neşir edilenden soň, hytaý ägirtleriniň paýnamalarynyň bahasy pese gaçdy: Tencent-iň kagyzlary 10%, Bilibili-niňki 19%, NetEase-iňki 8% arzanlady.
Mundan öň Hytaý häkimiýetleri çagalara hepdede üç sagatdan köp wagtlap onlaýn oýunlary oýnamagy gadagan edipdi. Oýun oýnamaga diňe anna, şenbe we ýekşenbe günleri, şeýle-de baýramçylyk günleri 20:00-dan 21:00-a çenli rugsat berilýär.
