Hytaý Owganystany gözegçiliginde saklaýan «Taliban» hereketiniň (RF-da gadagan edilen terrorçylykly gurama) wekilleri bilen ýurduň iri mis ýatagy bolan Mes Aynagy peýdalanmagyň mümkinçilikleri hakynda gepleşiklere başlady diýip, Wall Street Journal habar berýär.
Ol ýer Kabulyň 40 km günorta-gündogarynda ýerleşip, peýdalanylmaýan magdanly ýerleriň arasynda metal ätiýaçlyklarynyň göwrümi boýunça iň ähmiýetlileriniň biri hasaplanýar we misiniň ýokary hilliligi bilen tapawutlanýar.
Şeýle-de, Pekin ýurduň demirgazyk böleginde ýerleşýän, Amyderýanyň nebit-gazly böleginde gazylyp alynýan peýdaly magdanlary özleşdirmek mümkinçiligini göz öňünde tutýar.
Bu magdan känlerine degişli gepleşikleriň başlanandygyny HHR-nyň Owganystandaky ilçisi Wan Ýuý tassyklady. Ýöne ol, maýa goýumlary özüni ödär ýaly, has bähbitli şertleriň zerurdygyny aýtdy. «Iki tarapyňam göwnejaý girdeji almagy has möhümdir» — diýip, ol belledi.
Gazetiň berýän habaryna görä, Owganystanda ýurduň demirgazygyndaky demir magdanynyň iri ýatagyny peýdalanmaga ygtyýar almak üçin Eýran hem öz gepleşiklerini geçirýär.
Ýerasty baýlyklary gazyp çykaryş işleri Owganystanda, awgustda talibanlaryň häkimiýet başyna gelmegi bilen tamamlanan uruş sebäpli, kän ýyllaryň dowamynda doňup galypdy. Şondan soň günbatar ýurtlarynyň, şol sanda amerikanyň kompaniýalary ýurtdan çykyp gitmage mejbur bolupdylar.
«Dünýäniň beýleki döwletleri peýdaly magdanlaryny gazyp alyp, ony öz ýurtlaryny ösdürmek üçin peýdalanýarka, biz 43 ýyla çeken urşa gatnaşmaly bolduk, şeýdibem biziň resurslarymyz el degrilmän galdy» — diýip, ýurduň Nebit we gazylyp alynýan peýdaly magdanlar ministri Şahabuddin Dilawar neşire habar berdi.
Owganystan dünýäde iň garyp ýurtlaryň biri hasaplanýar, emma bu ýerde altynly, gymmatbaha daşly, kömürli, nebitli, gazly, litiýli we ýerden alynýan seýrek minerally ýataklaryň bardygy anyklandy. On ýyl mundan öň amerikan ekspertleri ýurduň ähli mineral resurslarynyň bahasy 1 trln. $ diýip kesgitlediler.
