Şu gün — 14-nji martda Aşgabatda Türkmenistanda Saýlawlary we sala salşyklary geçirmek boýunça merkezi toparyň mejlisi geçirildi. Onda Türkmenistanyň Prezidentiniň saýlawlary boýunça saýlaw möwsüminiň netijeleri jemlenildi.
Ýeri gelende bellesek, Saýlaw kodeksiniň 45-nji maddasyna laýyklykda, Türkmenistanyň Demokratik, Agrar hem-de Senagatçylar we telekeçiler partiýalary tarapyndan dalaşgärleriň 3-si, 46-njy maddasyna laýyklykda bolsa raýatlaryň teklipçi toparlary tarapyndan dalaşgärleriň 6-sy iň ýokary döwlet wezipesine hödürlenildi we merkezi saýlaw toparynda bellige alyndy. Türkmenistanyň çäginde döredilen saýlaw uçastoklarynyň 2577-sinde we daşary ýurtlardaky ilçihanalarymyzyňdyr konsullyklaryň ýanyndaky saýlaw uçastoklarynyň 41-sinde ses bermek üçin ähli zerur şertler üpjün edildi.
12-nji martda geçirilen saýlawlar gününde sagat 19-a çenli hasaba alnan sesleriň umumy sany 97,12 göterime deň boldy. Has takygy, saýlawçylaryň Ahal welaýatynda 97,68, Balkan welaýatynda 97,29, Daşoguz welaýatynda 96,80, Lebap welaýatynda 97,13, Mary welaýatynda 96,97, Aşgabat şäherinde bolsa 97,51 göterimi ses berdiler. Şeýle-de daşary ýurtdaky saýlaw uçastoklarynda saýlawçylaryň 90,93 göterimi ses bermäge gatnaşdylar.
Merkezi saýlaw toparynyň başlygy şular barada aýdyp, Prezident saýlawlarynyň netijeleriniň ýakyn wagtda yglan ediljekdigini habar berdi.
