Bellinsonada Şweýsariýanyň Federal jenaýat kazyýetiniň prokuraturasy “Pari Sen-Žermen” futbol klubunyň prezidenti Nasser Al-Helaifiniň 28 aý möhlet bilen azatlykdan mahrum edilmegini talap edýär. Bu barada L’Equipe habar berdi diýip, RIA Nowosti belleýär.
Halkara futbol federasiýasynyň (FIFA) öňki baş sekretary Žerom Walkeniň bolsa prokurorlar 35 aý tussag edilmegini talap edýärler.
Öň Şweýsariýanyň Federal jenaýat kazyýeti Al-Helaifi bilen Walkeniň işine seredipdi. 2020-nji ýylyň güýzünde Al-Helaifi aklanyldy, Walke bolsa 120 gün şertli möhleti aldy. Şweýsariýanyň prokuraturasy şonda “PSŽ-niň” prezidentiniň 28 aý azatlykdan mahrum edilmegini isläpdi, Walke bolsa üç ýyl tussag edilmek howpy abanypdy.
Al-Helaifini we Walkeni parahorlykda, kezzapçylykda, işine perwaýsyzlykda we resminamalary galplaşdyrmakda aýyplaýan kazyýet işi 2017-nji ýylda Şweýsariýada gozgaldy. Üç ýyl geçensoň, “PSŽ-niň” prezidentiniň ylalaşyk şertnamasynyň çäginde 1 mln Şweýsariýa frankyny (1 mln dollardan gowrak) töländigi, şondan soň Şweýsariýanyň prokuraturasynyň ondan korrupsiýa aýyplamalarynyň käbirini aýrandygy barada maglumat peýda boldy.
Walke FIFA-nyň baş sekretary bolan wagtynda Al-Helaifiden 1,4 – 2,3 mln ýewro maliýe bähbidini, aýratynam 2014-nji ýylyň martyndan 2015-nji ýylyň sentýabryna çenli Sardiniýadaky willany ulanmak hukugyny almakda aýyplandy. Derňewçileriň pikiriçe, ol muny 2026-njy we 2030-njy ýyllaryň dünýä çempionatlary üçin telewizion hukuklaryny Al-Helaifiniň gözegçilindäki media toparyna bermegiň deregine edipdir.
