Londonyň “Çelsi” futbol klubunyň eýesi Roman Abramowiç kluby satmak kararyna geldi. Bu barada “Çelsiniň” metbugat gullugy habar berýär diýip, TASS belleýär.
“Men hemişe klubuň bähbitlerini göz öňünde tutup karara geldim. Häzirki ýagdaýda-da men kluby satmak pikirini has dogry hasaplaýaryn, bu klubuň janköýerleri, işgärleri, hemaýatkärleri we hyzmatdaşlary üçinem gowy bolar. Biler bolsaňyz, “Çelsi” bilen şeýle ýagdaýda aýrylyşmak baradaky netijä gelmek maňa diýseň kyn düşdi” – diýip, Abramowiç aýtdy.
“Men soňky gezek “Stemford Brije” baryp, ähliňiz bilen hoşlaşyp bilerin diýip umyt edýärin. “Çelsiniň” bir bölegi bolmak uly artykmaçlyk boldy we men bilelikde gazanan üstünliklerimize buýsanýaryn. “Çelsi” we onuň janköýerleri elmydama meniň ýüregimde bolar” – diýip, Abramowiç sözüniň üstüni ýetirdi.
Abramowiç “Çelsini” öňki eýesi Ken Beýtsden 2003-nji ýylda, takmynan, 140 mln funt sterlinge (şol wagtky hümmet boýunça takmynan, $233 mln) satyn aldy.
Abramowiçiň ýolbaşçylyk eden döwründe “Çelsi” bäş gezek Angliýanyň çempiony, bäş gezek Angliýanyň Kubogynyň, üç gezek Angliýanyň ligasynyň kubogynyň we iki gezek ýurduň Super kubogynyň eýesi, iki gezek Çempionlar ligasynyň (2012, 2021) we Ýewropa ligasynyň (2013, 2019) ýeňijisi boldy. 2021-nji ýylda topar UEFA-nyň Super kubogynda we Klublaýyn dünýä çempionatynda ýeňiji boldy.
