Birleşen Milletler Guramasy (BMG) Howanyň üýtgemegi boýunça hökümetara hünärmenler toparynyň hasabatyna salgylanmak bilen golaýlaýan klimat heläkçiligi barada duýdurýar. Guramanyň bellemegine görä, global ýylamany haýallatmak üçin ýurtlar tarapyndan görülýän çäreler ýeterlik derejede däl, bu bolsa Ýer ýüzüniň ilaty üçin ölüm howpuny döredýär. Bu barada lenta.ru belleýär.
Hasabatyň awtorlary daşky gurşawyň ýaramazlaşmagynda Uly ýigrimiligiň (G20) ýurtlaryny günäkär hasaplaýarlar. BMG-niň Baş sekretary Antoniu Guterriş hökümetleri gazylyp alynýan ýangyjyň çykarylmagyny maliýeleşdirmegi bes etmäge we uglerod bitaraplygyna ýetmek wadasyna çynlakaý garamaga çagyrdy. “Gazylyp alynýan ýangyç biziň planetamyzy, görnüşlerimizi we ykdysadyýetimizi agyr ýagdaýa getirer” – diýip, Guterriş belledi.
Klimat çökgünliginiň öňüni almak üçin adamzat dünýädäki ortaça temperaturanyň industrialdan öňki dereje bilen deňeşdirilende, Selsiý boýunça 1,5 gradusdan geçmegine ýol bermeli däl. Munuň üçin 2030-njy ýyla çenli kömürturşy gazynyň zyňyndylaryny 45 göterim azaltmak we 2050-nji ýyla çenli uglerod bitaraplygyny gazanmak zerurdyr.
“Ýöne häzirki ýagdaýy göz öňünde tutsak, global hapalanmagyň derejesi häzirki onýyllykda 14 göterim ýokarlanar. Bu 1,5 gradusdan geçmezlik üçin bar bolan ähli mümkinçilikleri ýok eder” – diýip, Guterriş aýtdy.
Klimatologlaryň pikiriçe, ýagdaýa mundan beýläk hem ähmiýet berilmese, geljek 20 ýylda adamlar ekoulgamlaryň kollapsy, adatdan daşary gyzgynlyk we beýleki kataklizmler, şeýle-de biologik görnüşleriň ýok bolmagy bilen ýüzbe-ýüz bolarlar.
