TmCars.info-nyň ozal habar berşi ýaly, 4-nji fewralda Prezident Gurbanguly Berdimuhamedow HHR-iň Başlygy Si Szinpiniň çakylygy boýunça Pekinde geçirilýän XXIV gyşky Olimpiýa oýunlarynyň açylyş dabarasyna gatnaşdy. Ertir — 5-nji fewralda Türkmenistanyň hem-de Hytaýyň Liderleri ýokary derejeli ikitaraplaýyn gepleşikleri geçirerler. Bu barada HHR-iň daşary işler ministri Wan I Türkmenistanyň DIM-niň ýolbaşçysy Raşid Meredow bilen geçirilen gepleşikleriň dowamynda habar berdi.
Bellenilişi ýaly, gepleşikleriň çäklerinde Türkmenistanyň Prezidenti bilen HHR-iň Başlygy ikitaraplaýyn hyzmatdaşlygyň häzirki ýagdaýyny we geljekki mümkinçiliklerini ara alyp maslahatlaşarlar. Bu duşuşyk iki ýurduň Liderleriniň soňky 4 ýylda ilkinji gezek ýüzbe-ýüz görnüşde geçirýän gepleşigi bolar.
Hytaýyň Baş diplomatynyň sözlerine görä, iki ýurduň Liderleriniň duşuşygy uzak möhletleýin, durnukly ösüşi gazanmakda möhüm orun eýeläp, energetika, tebigy baýlyklary gazyp almak, lukmançylyk, ulag we medeniýet bilen bagly ugurlarda derwaýys meseleleri ara alyp maslahatlaşmaga mümkinçilik berer.
