12-nji iýulda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň Belarus Respublikasynyň Türkmenistandaky ilçisi Stanislaw Çepurnoý bilen duşuşygy boldy. Bu barada “Watan” habarlar gepleşiginde habar berildi.
Diplomat duşuşygyň öňüsyrasynda Belarus çagalar gaznasynyň müdiriýetiniň başlygy Lýudmila Kondraşowanyň Oguljahan Atabaýewa iberen minnetdarlyk hatyny gowşurdy.
Duşuşygyň dowamynda O.Atabaýewa gaznanyň alyp barýan işi barada aýdyp, şu ýyl Gaznanyň döredilmegine 4 ýyl dolandygyny hem-de bu geçen döwür içinde Gaznanyň serişdeleriniň hasabyna köp ynsanperwer işleriň amala aşyrylandygyny belledi. Hususan-da, dürli kesellerden ejir çekýän ýüzlerçe çagalara kardiohirurgiki, neýrohirurgiki, ortopediki we beýleki operasiýalar geçirildi.
2023-nji ýylda Gurbanguly Berdimuhamedow adyndaky Çagalar sagaldyş-dikeldiş merkezi açyldy. Şeýle hem onuň çäginde inklýuziw çagalar bagy hereket edýär.
Diplomat Gurbanguly Berdimuhamedow adyndaky haýyr-sahawat gaznasynyň diňe bir Türkmenistanda däl, eýsem, daşary ýurtlardaky çagalara hem ynsanperwer kömegini berýändigini belläp, gaznanyň alyp barýan işiniň adamlary haýyr-sahawat işine ruhlandyrýandygyny we ynsanperwer jemgyýeti döretmäge ýardam berýändigini belledi.
