18 ýaşly türkmen pälwany Alp Arslan Begenjow 20 ýaşa çenli türgenleriň arasynda Gyrgyzystanyň Bişkek şäherinde geçirilýän erkin göreş boýunça Aziýanyň ýaşlar çempionatynda 79 kg agram derejede üçünji orny eýeledi.
A.Begenjow bürünç medal ugrunda tutluşykda özbegistanly Jorullo Abdufattohowy 12:1 hasaby bilen ynamly ýeňdi.
Çärýek final tapgyrynda Begenjow hindi pälwany Amit Amit bilen duşuşdy. Tutluşygyň dowamynda türkmen türgeni ikinji döwüň soňuna çenli 6:3 hasaby bilen öňdeligi saklaýardy. Emma garşydaşy güýçli usul bilen hüjüm edip, wagtyndan öň ýeňiş gazandy.
Şu ýylyň iýun aýynda hem Begenjow Wýetnamda geçirilen 23 ýaşa çenli türgenleriň arasynda Aziýanyň ýaşlar çempionatynda şol bir agramda kümüş medal gazanypdy.
Mundan ozal, 2024-nji ýylyň sentýabr aýynda Ispaniýanyň Pontewedra şäherinde geçirilen dünýä çempionatynda Alp Arslan Begenjow 20 ýaşa çenli türgenleriň arasynda erkin göreş boýunça Türkmenistandan ilkinji dünýä çempiony bolupdy.
