3-nji fewralda geçirilen Ministrler Kabinetiniň sanly ulgam arkaly nobatdaky mejlisinde Prezident Gurbanguly Berdimuhamedow wise-premýer S.Toýlyýewe ýüzlenip, Türkmenistanyň Hökümet wekiliýetiniň XXIV gyşky Olimpiýa oýunlarynyň açylyş dabarasyna gatnaşmak üçin Hytaý Halk Respublikasyna iş sapary bilen barýandygy sebäpli, Keselleriň ýaýramagyna garşy göreşýän adatdan daşary toparyň başlygynyň wezipesini wagtlaýyn ýerine ýetirmegi bu toparyň başlygynyň orunbasary - saglygy goraýyş we derman senagaty ministri N.Amannepesowyň üstüne ýükleýändigini aýtmak bilen, degişli resminama gol çekdi.
Türkmen Lideri wise-premýer S.Toýlyýewden Keselleriň ýaýramagyna garşy göreşýän adatdan daşary toparyň Düzgünnamasyna laýyklykda, sapardan gaýdyp gelnenden soň nähili hereket etmelidigi barada teklibini bermegi sorady. Wise-premýer Düzgünnama laýyklykda, arassaçylyk kadalaryny ýerine ýetirmek üçin sapardan gelnenden soň hökmany suratda karantin çärelerini berjaý etmelidigini aýtdy.
Bellenilişi ýaly, bu çäreleriň iň gysga wagty 3 gün, ortaça wagty 10 gün, iň wajyp wagty bolsa 21 gün bolmaly. Şundan ugur alyp, döwlet Baştutany: «Biz karantin çäreleriniň haýsy hem bolsa birini berjaý edip, arassaçylyk talaplaryna görä, iň azyndan 3 gün, ýagny ýekşenbe, duşenbe we sişenbe günlerinde karantinde bolmaly bolarys» diýip nygtady.
