Germaniýanyň Daimler AG awtokonserni 1-nji fewralda resmi taýdan Mercedes-Benz Group AG diýlip atlandyryldy, kompaniýanyň birža nyşany hem üýtgäp, öňki “DAI” indi “MBG” boldy. Bu barada awtoöndürijiniň metbugat gullugy habar berýär.
Konserniň ýolbaşçylygy geçen ýylyň başynda uly göwrümli üýtgeşmeler barada habar berdi. Dekabr aýynda ýük awtoulaglaryny we awtobuslary çykarmak bilen meşgullanjak aýratyn täze Daimler Truck AG kompaniýasy döredildi. Indi bolsa ýolagçy awtoulaglaryny, şeýle-de ýeňil söwda awtoulaglaryny öndürmek üçin özbaşdak ganat Mercedes-Benz Group AG-niň dörändigi habar berildi.
Öňküsi ýaly kompaniýa esasy dört ugry ösdürer. Mercedes-Benz ady bilen umumy modeller hatary, Mercedes-AMG brendi bilen olaryň sport görnüşleri, Mercedes-Maybach we Mercedes-EQ brendleri bilen lýuks awtoulaglar hem-de elektromobiller çykarylar.
Mercedes-Benz Group AG-niň ýolbaşçysy Ola Kalleniusyň aýtmagyna görä, kompaniýa geljekde zyýanly zyňyndylary atmosfera goýbermeýän awtoulaglaryň önümçiligine üns berer. Kompaniýanyň iň soňky awtoulagy 2022-nji ýylyň ýanwar aýynyň başynda görkezilen EQXX synag elektromobili boldy.
Konsept-kar peýdaly hereket koeffisiýenti 95%-e barabar bolan 204 at güýji bolan elektrik hereketlendirijisi we 100 kilowatt-sagatlyk batareýa bilen üpjün edildi. Akkumulýator ätiýaçlygy üçekde gurnalan gün panelleriniň kömegi bilen hem doldurylýar. Awtomobil goşmaça zarýad bermezden 1000 km çenli aralygy geçip bilýär. Deňeşdirmek üçin bellesek, Mercedes EQS flagman modeliniň batareýa ätiýaçlygy goşmaça zarýad bermezden 400-660 km aralyga ýeterlikdir.
