Bütindünýä Meteorologiýa Guramasy (BMG) iki sany täze dünýä rekordyny – ýyldyrym çakmasynyň iň ýokary uzynlygyny we iň ýokary dowamlylygyny hasaba aldy. Bu barada BMG-niň ýöriteleşdirilen edarasy bolan Bütindünýä Meteorologiýa Guramasynyň habarynda aýdylýar diýip, TASS habar berýär.
BMG-niň adatdan daşary howa we klimat hadysalary boýunça komiteti iň täze hemra tehnologiýalarynyň kömegi bilen 2020-nji ýylyň 29-njy aprelinde ABŞ-nyň günorta sebitlerinde keseligine 768 km plýus-minus 8 km aralygy gurşap alan ýyldyrymy iň uzyn ýyldyrym diýip ykrar etdi. Bu öňki rekorddan – 2018-nji ýylyň 31-nji oktýabrynda Braziliýada çakan ýyldyrymdan 60 km geçýär. Ýyldyrym ýalpyldysynyň dowamlylygy barada aýdylanda, indi dünýä rekordy 2020-nji ýylyň 18-nji iýunynda Urugwaýda we Argentinanyň demirgazyk sebitlerinde hasaba alnan ýyldyryma degişli: ýyldyrym ýalpyldysy 17,102 sekunt plýus-minus 0,002 sekunt dowam etdi. Häzire çenli rekord diýlip 2019-njy ýylyň 4-nji martynda Argentinada tupan wagty hasaba alnan 16,73 sekunt görkeziji hasaplanylypdy.
BMG tarapyndan iki sany täze rekordyň hasaba alynmagy bilen baglylykda guramanyň baş sekretary Petteri Taalas “ýyldyrymyň uly howp bolup, her ýyl köp sanly adam ölümine sebäp bolýandygyny” belledi. BMG 1975-nji ýylda Zimbabwede bir külbä göni ýyldyrymyň çakmagy netijesinde ol ýerdäki 21 adamyň ölendigini ýatlap geçdi. BMG-niň arhiwinde ýyldyrym çakmasynyň gytaklaýyn netijeleri boýunça iň agyry hökmünde 1994-nji ýylda Müsüriň Dronka ilat nokadynda bolan betbagtçylyk hasaba alyndy, şonda nebit ammarynyň ýanmagy netijesinde 469 adam aradan çykdy.
