Saud Arabystanynyň milli awiagatnadyjysy – Saudi Arabian Airlines kompaniýasy maý aýynda Tailanda göni gatnawlary dikeltmegi meýilleşdirýändigini aýtdy. Bu barada Saudi Gazette neşiri habar berdi diýip, TASS belleýär.
Hepdede yzygiderli gatnawlaryň sany heniz belli däl. Tailandyň Raýat awiasiýasy edarasynyň müdiri Suttipong Kongpulyň aýtmagyna görä, Saudi Arabian Airlines uçuşlaryň tertibi üçin entek resmi arza tabşyrmady.
“Awiakompaniýa tarapyndan mälim edilen tertibe laýyklykda, uçuşlar 2022-nji ýylyň maý aýynda başlar, bu Tailandyň Raýat awiasiýasy edarasynyň gatnawlary bellän tomusky uçuş tertibiniň wagty hasaplanýar. Ýöne biz henizem boş ýer tapýarys. Eger Saudi Airlines uçuş üçin arza bermek işine başlasa, men ol bellenilen döwürde uçup biler diýip hasaplaýaryn” – diýip, Suttipong aýtdy.
Saud Arabystanynyň Tailand bilen awiagatnawy ýurtlaryň arasyndaky diplomatik gatnaşyklaryň ýagdaýynyň peselmegi sebäpli, takmynan, 30 ýyl mundan öň kesilipdi.
2022-nji ýylyň 25-nji ýanwarynda Tailandyň premýer-ministri Praýut Çan-Oça mirasdüşer şazada Muhammed ben Salman Al Saudyň çakylygy boýunça Saud Arabystanyna geldi, bu hem 30 ýyldan gowrak wagtyň içinde şeýle derejeli ilkinji resmi sapar boldy. 26-njy ýanwarda mirasdüşer şazada we premýer-ministr ýakyn wagtda iki ýurduň paýtagtlarynda ilçileri bellemek we Saud Arabystany bilen Tailandyň arasyndaky diplomatik gatnaşyklary doly kadalaşdyrmak barada ylalaşdylar.
