Geçen hepdäniň netijeleri boýunça ABŞ-da energiýa serişdeleriniň ätiýaçlyklarynyň artmagy hakynda çarşenbe güni resmi maglumatlar çap edilenden soň, nebitiň bahalary ýokarlanyp başlady.
«Brent» söwda belgili nebitiň martdaky fýuçersleriniň bahasy Londonyň ICE Futures biržasynda barreli üçin 90,01 dollara bardy. Bu görnüşli nebitiň bahasy 2014-nji ýylyň 13-nji oktýabryndan bäri ilkinji gezek barreli üçin 90 dollardan ýokary geçdi diýip, Interfaks habar berýär.
WTI nebitiniň mart üçin fýuçersleriniň bahasy Nýu-Ýorkuň haryt biržasynda 1,99 % artyp - barreli üçin 87,3 dollara ýetdi. WTI-niň bahalary hem soňky 7 ýylda iň ýokary çäginde saklanýarlar.
ABŞ-nyň Energetika ministrliginiň maglumatlaryna görä, ABŞ-da nebitiň harytlyk ätiýaçlyklary geçen hepdede 2,38 mln barrl artyp - 416,19 mln barrele ýetdi.
Şol bir wagtda, köp sanly analitikler nebite bolan islegiň mundan beýläk hem artmagyna garaşýarlar, käbir maýa goýum banklary, şol sanda Goldman Sachs şu ýylda Brent nebitiniň 100 dollara çenli gymmatlamagyny çaklaýarlar.
Citigroup-yň hünärmenleri, muňa garamazdan, 2022-nji ýylyň dördünji çärýeginde nebitiň bahalarynyň 20 % pese düşmegine we ortaça 65 dollara deň bolmagyna garaşýarlar.
