Şu gün — 26-njy ýanwarda Söwda-senagat edarasynyň binasynda «Türkmen topragy — dünýä ýaň salan medeni gymmatlyklaryň ojagy» atly halkara ylmy-amaly maslahat we sergi öz işine başlady. Ir bilen oňa gatnaşyjylar türkmen milli gymmatlyklaryna bagyşlanan sergä aýlanyp gördüler hem-de bu ýerde türkmen alabaý itleri we tazylary, şeýle-de el işleriniň dürli görnüşleri bilen tanyş boldular.
Soňra «Türkmen topragy — dünýä ýaň salan medeni gymmatlyklaryň ojagy» atly halkara ylmy-amaly maslahatyň umumy mejlisi geçirildi. Onuň dowamynda milli itşynaslyk tejribesini ösdürmek we dünýä ýaýmak, türkmen alabaý itlerini terbiýelemegiň we köpeltmegiň mili aýratynlyklary, şeýle-de türkmen halylary, alabaý itleriniň heýkelleri, türkmen haly nagyşlarynyň gadymy we orta asyr binagärlik bezeglerinde ulanylan görnüşleri, türkmen alabaý itleri bilen bagly arheologik tapyndylar hem-de olaryň haly we beýleki milli el işlerindäki çeper beýany barada çykyşlar diňlenildi.
«Türkmen topragy — dünýä ýaň salan medeni gymmatlyklaryň ojagy» ady bilen üç gün dowam etjek halkara ylmy-amaly maslahat işini bölümçeler boýunça dowam eder. Degişli maslahatlar Türkmen döwlet medeniýet institutynda, Halkara «Türkmen alabaý itleri» assosiasiýasynda, Magtymguly adyndaky Türkmen döwlet uniwersitetinde, Türkmen halysynyň milli muzeýinde, Jemgyýetçilik guramalarynyň merkezinde geçiriler.
