22-nji ýanwar güni irden bitkoiniň bahasy 9% pese gaçyp, 35,1 müň dollara çenli aşak düşdi we 2021-nji ýylyň 24-nji iýulyndan bäri iň pes görkezijisini täzeledi. Bu barada rbc.ru habar berdi.
“CoinGecko”-nyň maglumatlaryna görä, bitkoin söwdasynyň möçberi 35 milliard dollar bolup, aktiwiň bazar kapitalizasiýasy 674 milliard dollara çenli azaldy.
20-nji ýanwarda, bahasy 43,5 müň dollardan geçip gaýdandan soň, bitkoin birden arzanlap başlady. 10-njy noýabrdaky ýeten iň ýokary derejesinden (69 müň dollardan) soň onuň bahasy 48% pese gaçdy.
Kriptowalýuta bazaryndaky pese gaçyşyň 20-nji ýanwarda geçirilen söwda sessiýasynyň netijelerine görä 1% aşaklan we 21-nji ýanwarda 2% peselmegini dowam etdiren S&P 500 indeksiniň pese gaçmagy sebäpli ýüze çykan bolmagy-da ähtimal diýlip bellenilýär. Şunuň bilen baglylykda, ozal “Arcane Research” analitika kompaniýasy bitkoin alyş-çalyş hümmeti bilen S&P 500 indeksiniň arasyndaky baglanyşygyň 2020-nji ýylyň oktýabr aýyndan bäri rekord derejä ýetendigini habar beripdi diýip, çeşme habar berýär.
