Microsoft wideo oýunlaryny dörediji Activision Blizzard kompaniýasyny satyn alandygyny yglan etdi. Bu geleşik korporasiýasynyň bütin taryhynda, şeýle hem wideo oýunlar senagatynda iň iri geleşik bolup durýar diýip, ixbt.com The Wall Street Journal neşirine salgylanyp habar berýär.
2023-nji ýylyň iýunynyň ahyryna çenli tamamlanmagy göz öňünde tutulýan geleşigiň bahasy 68,7 milliard dollar. Bu habardan soň, Activision Blizzard-yň paýnamalarynyň her biriniň bahasy 65,39 dollar gymmatlady.
Activision Blizzard — iri oýun we interaktiw kontent döredijidir. Kompaniýanyň döreden oýunlarynyň sanawynda Call of Duty, Candy Crush, Warcraft, Diablo, Overwatch we Hearthstone ýaly meşhur oýunlar bar.
Microsoft-da bellemeklerine görä, bu geleşik kompaniýanyň mobil enjamlarda, kompýuterlerde, konsollarda we bulut ulgamlarynda oýun işewürligini ösdürmäge ýardam eder. Mundan başga-da, bu meta älemi gurmaga nobatdaky uly ädim bolar.
Activision-de öz içinde bolşy ýaly, Blizzard-da hem köp sanly dawalar zerarly çylşyrymly döwür başdan geçirilýär. Mümkin, Microsoft hut şundan hem peýdalanmak isländir. Belläp geçsek, Activision Blizzard-yň häzirki bazar bahasy 50 milliard dollar. Kompaniýanyň ýolbaşçysy Bobbi Kotik häzirlikçe ony dolandyrmagyny dowam eder.
Ýatlatsak, geçen ýylda Microsoft kompýuter wideo oýunlaryny dörediji Bethesda kompaniýasyny satyn alypdy. Şol geleşigiň bahasy 7,5 milliard dollar boldy.
