Indoneziýanyň Kalimantan adasynyň günorta-gündogarynda guruljak täze paýtagty Nusantara diýlip atlandyrylar. Terjime edilende ol «arhipelag» diýmegi aňladýar. Ýurduň milli ösüşini meýilnamalaşdyrmak ministri Suharso Monoarfa Hökümet mejlisinde degişli beýanat bilen çykyş etdi diýip, TASS CNA teleýaýlymyna salgylanyp habar berdi.
«Men Prezidentiň [Joko Widodo] tassyklamasyny we görkezmesini aldym, täze paýtagt Nusantara diýlip atlandyrylar» - diýip, ministr «bu adyň Indoneziýanyň çäginden daşynda hem örän meşhurdygyny hem-de ýurdy arhipelag hökmünde gysgadan häsiýetlendirýändigini » sözüniň üstüne goşdy.
Prezident Widodo Indoneziýanyň paýtagtyny göçürmek meýilleri hakynda 2019-njy ýylda habar berdi. Alymlaryň bellemegine görä, Jakartanyň 2050-nji ýyla çenli üçden bir bölegi suwuň astynda galyp biler. 10 million ilaty bolan şäher ummanda suwuň derejesiniň ýokary göterilýändigi sebäpli gark bolup barýar. Sillerden başga-da, köne paýtagt ilatynyň aşa agdyklyk etmegi, ýaramaz şähergurluşyk meýilleşdirmesi, suw we lagym üpjünçilik ulgamyndaky meseleler, şeýle hem ýollardaky dykynlar zerarly ejir çekýär.
Paýtagty göçürmek üçin döwlet tarapyndan 32 milliard dollara çenli bölünip berildi. Emma koronawirus pandamiýasy zerarly taslamanyň durmuşa geçirilişi togtadyldy, ony iki ýyldan gaýtadan dikeltmek meýilleşdirilýär.
Indoneziýa dünýäniň 18 müň adadan ybarat bolan iň iri arhipelagynda ýerleşýär.
