Geçen ýyl ýarym geçirijileriň ýetmezçiligi we COVID-19 pandemiýasynyň dowamly täsiri sebäpli awtoulag senagaty üçin örän agyr ýyl boldy. Ýöne bu päsgelçiliklere garamazdan, Bentley öz taryhynyň iň gowy ýylyny ýazdy. 2021-nji ýylda bu awtoöndüriji 14 659 awtomobil satdy, bu 2020-nji ýylda satylan 11 206 awtomobilden 31% köpdür. Bu barada pnzdrive.ru habar berýär.
Brend Bentayga awtoulagynyň iň köp satylýan model bolup galandygyny belledi. 2021-nji ýylda gibrid transmissiýasynyň goşulmagy sebäpli islendik geçen ýyla garanyňda, has köp nusga satyldy. Bentayga-nyň paýyna Bentley-iň umumy satuwynyň 40%-i düşýär. Continental GT-niň satuwy hem ýokarlanyp, brendiň satuwynyň 33%-ine barabar boldy, Coupe we Convertible modelleriniň arasynda 60/40% paýlandy. Flying Spur modeline satuwyň 27%-i degişli boldy.
Amerika Bentley üçin iň uly bazar bolup, onda 4 212 awtomobil satyldy, bu 2020-nji ýyla garanyňda 39% köpdür. Onuň yzyndan 4 033 awtomobil bilen Hytaý gelýär, bu geçen ýyldan 40% köp. Ýewropanyň paýyna 2520 awtomobil düşdi. Aziýa-Ýuwaş umman sebitinde 1651 awtomobil, Beýik Britaniýada 1328 awtomobil we Ýakyn Gündogarda 915 awtomobil satyn alyndy.
