New York Times gazeti dünýäniň iň iri sport habar beriş serişdeleriniň biri bolan — The Athletic-i satyn almak barada ylalaşyk gazandy. Bu barada gazetiň saýtynda habar berilýär.
Geleşigiň bahasy 550 mln dollara barabar bolup, ol şu ýylyň apreline çenli doly işlenip tamamlanmaly. Bellenilişi ýaly, bu geleşik 8 million abunaçysy bolan New York Times-y baş maksadyna — 2025-nji ýyla çenli 10 million abunaça eýe bolmak maksadyna golaýlaşdyrýar.
«Häzir biz 10 million abunaçydan has artyk maksady yzarlaýarys. The Athletic-iň mümkin bolan abunaçylarymyzyň bazaryny has giňeltjekdigine ynanýarys» — diýip, Times Company-nyň ýerine ýetiriji direktory Meredit Kopit Lewýen belleýär. Onuň sözlerine görä, habar beriş serişdeleriniň ikisiniň hem abunaçylarynyň sany «degişlilikde, o diýen köp däl».
The Athletic-iň abunasynyň bahasy aýda 7,99 dollara barabar. Bu portalyň abunaçylarynyň sany 1,2 million adam hasaplanylýar.
Portalda 600 töweregi işgär bolup, şolaryň 400-si habarlar bölüminde işleýär. Bu görkeziji ony ABŞ-da ESPN teleýaýlymyndan soň sport neşirleriniň arasynda iň iri iş berijileriň hatarynda ikinji orunda goýýar.
