Huawei hytaý kompaniýasy Huawei Precision Manufacturing atly täze golçur kärhanasyny hasaba aldy. Ol, esasan, simsiz we sanly energetiki önümler üçin ýokary takyk gurluşlary, komponentleri we enjamlary öndürmek bilen meşgullanar. Bu barada Şanhaýyň Yicai Global işewürlik habarlar çeşmesi habar berdi. Muny TASS ýetirýär.
Şol bir wagtyň özünde Yicai Global-yň kompaniýadaky çeşmesi bu gurluşyň çip öndürmek bilen baglanyşyklydygy baradaky gürrüňleri ret etdi. “Biz çip öndürmeris. Biziň esasy işimiz Huawei-niň simsiz we sanly energetiki önümleri üçin käbir esasy gurluşlary, modullary we komponentleri öndürmekde, şonuň bilen birlikde birnäçe önümleri ýygnamakda, gaplamakda we synagdan geçirmekde jemlenýär” – diýip, ol çeşmäniň sözlerini getirýär.
Korporatiw informasion platformasy Qichacha-nyň habaryna görä, täze golçur kompaniýanyň düzgünnama maýasy 600 mln ýuana (takmynan, $94,1 mln) barabar. Onuň iş sferasyna optiki aragatnaşyk enjamlary, optoelektron gurluşlar, elektron bölekler we ýarym geçiriji diskret enjamlar ýaly ugurlar boýunça işler girer.
2020-nji ýylda Huawei-niň arassa girdejisi 64,6 mlrd ýuan (takmynan, $10,1 mlrd) bolup, 2019-njy ýyldaky görkezijiden 3,2% ýokary geçdi, umumy satuw girdejisi ýyllyk aňlatmasynda 3,8% ýokarlanyp, 891,4 mlrd ýuan (takmynan, $139,4 mlrd) boldy.
2021-nji ýylyň ilkinji üç çärýeginde satuw girdejisi 455,8 mlrd ýuana çenli ($71,3 mlrd) peseldi, 2020-nji ýylyň ýanwar – sentýabr aýlarynda bu görkeziji 671,3 mlrd ýuan ($105 mlrd) boldy.
