Beunos-Aýresiň baş halkara howa menzilinde Argentinanyň milli futbol ýygyndysynyň öňki oýunçysy we tälimçisi Diego Maradonanyň heýkeli oturdyldy. Bu barada ýurduň ähli howa duralgalaryny dolandyrýan Aeropuertos Argentina 2000 (AA2000) kompaniýasynyň metbugat gullugy habar berdi. Muny Regnum habarlar agentligi ýetirýär.
“AA2000 Eseýsa halkara howa menzilinde 1986-njy ýylda Meksikada geçirilen dünýä çempionatynda futbol legendasynyň keşbini görkezýän 10-njy Belginiň heýkelini dabara bilen açdy” – diýip, Aeropuertos Argentina 2000 kompaniýasynyň metbugat gullugy belleýär.
AA2000-üň eýesi Eduardo Ernekýanyň bir wagtlar Maradona heýkelini oturtmagy hut özüniň teklip edendigi bellenilýär. Şonda Maradona razy bolýar, ýöne ýadygärligi Eseýsa howa menzilinde oturtmagy haýyş edýär. Beýik futbolçynyň doly göwrümli şekili 3D-çap etmek usuly bilen taýýarlanyldy.
“Taýýarlama prosesi 1986-njy ýylda Meksikada geçirilen dünýä çempionatynda milli gimniň aýtdyrylan pursaty Maradonanyň boljak final oýnuna ünsüni jemlän wagtyndaky suratlaryny ýygnamakdan başlandy” – diýip, Aeropuertos Argentina 2000-iň metbugat gullugy habar berýär.
Ýatlap geçsek, 1986-njy ýylyň dünýä çempionatynda Argentinanyň milli ýygyndysynyň düzümine hut Maradonanyň gatnaşmagy oňa köpden bäri garaşylan ýeňşi getirdi.
