Ýewropanyň häzirki çempiony Ispaniýa bilen Günorta Amerika kubogynyň ýeňijisi Argentinanyň arasyndaky «Finalissima» tituly ugrundaky futbol duşuşygy ýatyryldy. Bu barada El Chiringuito neşiri habar berýär.
Aslynda, duşuşygy 27-nji martda Kataryň «Lusaýyl» stadionynda geçirmek meýilleşdirilipdi. Emma žurnalistleriň berýän maglumatyna görä, Kataryň Futbol assosiasiýasy sebitdäki durnuksyz ýagdaý sebäpli ähli sport ýaryşlaryny we bäsleşiklerini wagtlaýynça togtatmak barada karar kabul etdi. Duşuşygyň ýatyrylandygy baradaky resmi habaryň ýakyn wagtda berilmegine garaşylýar.
Mundan ozal COPE neşiri duşuşygyň Madride, «Santýago Bernabeu» stadionyna geçirilip bilinjekdigi barada habar beripdi. Ýöne biraz soňra çeşmelerde Argentinanyň Futbol assosiasiýasynyň bu meýdançada oýnamakdan ýüz öwrendigi mälim edildi.
Ýatlap geçsek, bu kubogyň häzirki eýesi Argentinanyň ýygyndysydyr. Topar 2022-nji ýylda Londonyň «Wembli» stadionynda Italiýanyň ýygyndysyny 3:0 hasabynda ýeňipdi.
