«Inter Maýami» klubunyň hüjümçisi Lionel Messi we Argentina futbol assosiasiýasy (AFA) kezzaplykda hem-de şertnama borçlaryny bozmakda aýyplanýar. VID promouterlik kompaniýasy bu mesele boýunça Günorta Floridanyň kazyýetine şikaýat arzasy bilen ýüz tutdy.
Kazyýet resminamalaryna görä, VID kompaniýasy Argentinanyň ýygyndysynyň Wenesuela we Puerto-Riko garşy oktýabr aýynda geçirmeli iki sany ýoldaşlyk duşuşygyny guramak hukugy üçin AFA-na 7 million dollar töläpdir.
Söwdalaşygyň baş şerti oýunlara 38 ýaşly kapitanyň gatnaşmagydy. Şertnama boýunça Messi, eger şikesi bolmasa, her duşuşykda azyndan 30 minut meýdançada bolmalydy. Emma Wenesuela garşy oýunda futbolçy meýdança çykmady. Guramaçylar bolsa şol wagt Messiniň hiç hili şikesiniň bolmandygyny öne sürýärler.
Promouterler Messiniň we AFA-nyň bu hereketleriniň kompaniýany «millionlarça dollar» zyýana goýandygyny mälim etdiler. Kompaniýa diňe bir ýitirilen serişdelerini däl, eýsem goşmaça öwez puluny hem talap edýär.
Lionel Messi taryhda iň köp baýrakly futbolçydyr. Ol 2022-nji ýylyň dünýä çempiony, Çempionlar ligasynyň dört gezek ýeňijisi we köp sanly beýleki ýokary derejeli baýraklaryň eýesidir. Ol 2023-nji ýyldan bäri ABŞ-nyň «Inter Maýami» toparynda oýnaýar we geçen möwsümde toparyna ilkinji gezek MLS çempiony bolmaga kömek etdi.
