Gresiýanyň Afina şäheriniň häkimiýetleri sürüjilere elektromobiller üçin zarýad beriji stansiýalardan bir ýylyň dowamynda mugt peýdalanmaga rugsat berdiler. Bu başlangyjyň kömegi bilen şäher häkimligi ilatyň arasynda ekologiýa taýdan arassa ulagyň meşhurlygyny ýokarlandyrmagy we atmosfera zyýanly zyňyndylary azaltmagy meýilleşdirýär. Bu barada TheMayor.EU portaly habar berýär diýip, lenta.ru belleýär.
Häzirlikçe Gresiýanyň paýtagtynda 25 sany zarýad beriji nokat bar, ýöne şäher häkimligi infrastrukturany ösdürmegi meýilleşdirýär – munuň üçin ýewropa şäherinde elektrik hereketlendirijili ulaglaryň eýeleriniň sany artmaly. Ýaşaýjylary elektrokarlara geçmäge höweslendirmek üçin administrasiýa olaryň ýangyja sarp edýän çykdajylaryny wagtlaýyn azaltmak kararyna geldi.
Şäher häkimligi elektromobillere mugt zarýad bermek başlangyjyndan daşary Afinada planeta üçin zyýanlary azaltmak boýunça beýleki çäreleriň hem görülýändigini belledi. Merkezde awtomobilleriň hereketi çäklendirildi, welosiped ýollarynyň, pyýada köçeleriniň sany artdyryldy we seýil baglarynyň ýagdaýy gowulaşdyryldy.
