"PSŽ"-niň ýyldyz hüjümçisi Lionel Messi Çempionlar ligasynyň "Brýugge" toparyna garşy oýnunda (4:1) iki gol geçirip, dubl etmegi başardy. Şeýlelikde, ol täze üstünlik gazandy diýip, sport-express.ru habar berdi.
Squawkanyň ýazmagyna görä, argentinaly oýunçy Çempionlar ligasynda 38-nji toparyň derwezesine gol geçirdi. Bu görkeziji boýunça ol "Mançester Ýunaýtediň" hüjümçisi Kriştianu Ronaldu bilen birinji orny deň paýlaşdy.
Şeýle hem Messi karýerasyndaky gollarynyň sany boýunça rowaýaty Peleden öňe geçdi diýip, çeşme belleýär.
Ýene bir bellemeli zat, Lionel Messi oýunda özüniň bir goluny penaltiden geçirdi. Netijede, argentinaly hüjümçi özüniň Çempionlar ligasyndaky 22-nji penaltisini depip, Ronaldunyň ýene bir rekordyny gaýtalady. Ýöne Messi 11 metrlik bellikden 22 gezegiň 18-sinde gol geçirdi. Ronaldunyň bolsa häzir ÇL-de penaltiden 19 goly we 3 şowsuz synanyşygy bar.
