2-3-nji dekabrda Şwesiýanyň Stokgolm şäherinde ÝHHG-niň agza-döwletleriniň daşary işler ministrleriniň Geňeşiniň 28-nji mejlisi ÝHHG-niň häzirki başlygy, Şwesiýanyň daşary işler ministri A.Lindeniň ýolbaşçylygynda geçirildi. Mejlisiň işine ÝHHG sebitiniň döwletleriniň daşary syýasat edaralarynyň ýolbaşçylary we hemişelik wekilleri, şol sanda Türkmenistanyň wekiliýeti, şeýle hem 10 sany hyzmatdaş ýurtlaryň wekiliýetleri gatnaşdylar.
TDIM-niň internet saýtynda habar berlişi ýaly, mejlisiň dowamynda ÝHHG-niň agza döwletleriniň howpsuzlyk meseleleri, ýaragly çaknyşyklaryň öňüni almak, milletara howplara garşy göreşmek, daşky gurşawy goramak ugrunda hyzmatdaşlyk, gender deňligi we beýleki meseleler ara alnyp maslahatlaşyldy.
Türkmenistanyň wekiliýetiniň ýolbaşçysy öz çykyşynda guramanyň alyp barýan işleri bilen bagly meseleler boýunça Türkmenistanyň garaýyşlaryny beýan etdi. Türkmen tarapy Owganystanda parahatçylygy saklamak boýunça prosesiň we ýurtda ýagdaýlary durnuklylaşdyrmagyň kabul ederlikli ýollarynyň gözlegi boýunça gepleşikleriň dowam etdirilmeginde halkara jemgyýetçiligiň tagallalarynyň birleşdirilmeginiň wajypdygyny bellemek bilen, Owganystana ynsanperwerlik kömegini bermegi mundan beýläk-de dowam etmäge taýýardygyny nygtady.
Daşary işler ministrleriniň Geňeşiniň 28-nji mejlisiniň netijeleri boýunça konsensus esasynda howpsuzlyk we durnuklylyk meselelerine degişli ÝHHG-niň Strategiýasyny, ÝHHG-niň netijeliligini ýokarlandyrmak meselelerinde guramanyň esasy çemeleşmelerini, şeýle hem guramanyň işiniň beýleki wajyp ugurlaryny kesgitleýän degişli çözgütler kabul edildi.
