Indoneziýa taryhynda ilkinji gezek Ýigrimiligiň toparynda (G20) başlyklygy resmi taýdan öz üstüne aldy we pandemiýadan soň ykdysady dikelişe, energiýa geçişine we sanly üýtgeşmelere üns bermäge wada berdi. Prezident Joko Widodo Bali adasynda ýüzbe-ýüz görnüşde geçiriljek jemleýji sammitiň 2022-nji ýylyň 30-31-nji oktýabryna meýilleşdirilendigini aýtdy. Bu barada TASS habar berýär.
“Biz “Bilelikde gaýtadan dikeleliň, has güýçli bolarys” şygarynyň astynda dünýä ykdysadyýetini dikeltmek boýunça bilelikdäki tagallalary höweslendirmegi maksat edinýäris” – diýip, döwlet baştutany belledi we ýurduň “ýigrimilikde” başlyklyk etjek döwründe öňünde durýan wezipelerini hödürledi. Onuň aýtmagyna görä, Jakarta “inklýuziw, adamlara gönükdirilen, ekologiýa taýdan arassa we durnukly ösüşi üpjün etmäge gönükdirilendir”. Widodo Indoneziýanyň “energiýanyň gaýtadan dikeldilýän çeşmelere geçişini goldamak üçin halkara maliýeleşdirilmesi bilen global hyzmatdaşlyk platformasyny döretmegi teklip etmekçidigini” belledi. Onuň aýtmagyna görä, “energiýa geçişiniň howpsuzlyk we elýeterlilik ýörelgelerinde amala aşyrylmagyny kepillendirmek zerurdyr”.
G20-ni taýýarlamagyň we alyp barmagyň utgaşdyryjylaryndan biri bolan Indoneziýanyň DIM-niň başlygy Retno Marsudi ileri tutulýan ugurlaryň hatarynda COVID-19 pandemiýasyndan soň dünýä ykdysadyýetiniň dikeldilmegini, öndürijiligiň ýokarlandyrylmagyny, birleşigiň ýurtlarynyň arasynda hyzmatdaşlygyň berkidilmegini belledi. Şeýle-de, ol Indoneziýanyň koronawirusa garşy sanjymlary ýaýratmak işinde ösen we ösýän döwletleriň arasyndaky bölünişigi azaltmak üçin “saglygy goraýyş gurşawynda diplomatiýany” ösdürjekdigini aýtdy.
