Apple awtonom awtomobilini döretmek taslamasy baradaky täze gürrüňlerden soň, Kaliforniýadaky kompaniýanyň paýnamalary iň ýokary derejä ýetdi. Tehnologiýa ägirdiniň bazar kapitallaşdyrmasy 2,62 trillion dollara ýetdi, bu hem Apple kompaniýasyna Microsoft-dan öňe geçip, ýene-de dünýäniň iň gymmat kompaniýasyna öwrülmäge mümkinçilik berdi. Bu barada 3dnews.ru habar berýär.
Mundan öňki iň ýokary dereje şu ýylyň 7-nji sentýabrynda, ýagny kompaniýanyň paýnamalarynyň biri 157,26 dollardan satylanda gazanyldy. Bu habaryň ýazylan wagty olaryň bahasy 159,94 dollar boldy. Şeýlelik bilen, şu ýyl kompaniýanyň paýnamalary 22%-den gowrak ýokarlandy. Soňky 12 aýyň dowamynda olaryň bahasy 33%-den gowrak ýokarlandy. Apple-iň gymmatly kagyzlarynyň bahalarynyň şeýle ösüşi oňa bazar kapitallaşdyrmasy boýunça oktýabr aýynyň ahyrynda iň soňky çärýek hasabatyny neşir edenden soň, dünýäniň iň gymmat kompaniýasy bolan Microsoft-dan öňe geçmäge mümkinçilik berdi.
Apple-iň paýnamalarynyň ýokarlanmagy kompaniýanyň awtomobil bazaryna çykjakdygy baradaky gürrüňler bilen baglanyşyklydyr. Kompaniýa bu ugurda öňden bäri iş alyp barýar, şeýle-de bolsa ilkinji awtomobiliň çykarylmagyna azyndan üç ýyl galdy. Umuman, Apple-iň içinde 2025-nji ýylda ilkinji awtomobili çykarmak maksady optimistik hasaplanýar.
