Portugaliýanyň Oeýraş şäherinde dünýäniň ilkinji kosmonawty hasaplanýan Ýuriý Gagariniň býusty açyldy. Bu barada Russiýanyň Portugaliýadaky ilçihanasyna salgylanyp, RIA Nowosti habar berdi.
Ýadygärligiň açylyş dabarasy Taguspark tehnoparkynda adamzadyň kosmosa ilkinji uçuşynyň 60 ýyllygyna gabatlanyp geçirilen çärede bolup geçdi.
"Şu gün Ýuriý Gagariniň býustynyň açylmagy biziň halklarymyzyň we ýurtlarymyzyň arasyndaky gatnaşyklary ösdürmegiň ýolunda nobatdaky ädimidir" diýip, Russiýanyň Portugaliýadaky ilçisi Mihail Kamynin dabarada aýtdy.
Ol häzirki wagtda kosmos syýahatçylygynyň işjeň ösýändigini we ýakynda halkara kosmos stansiýasynda ilkinji çeper filmiň surata düşürilişiniň başlandygyny ýatlatdy.
"Kosmosa ilkinji uçuşy we ilkinji dünýä syýahaty amala aşyran gaýduwsyzlaryň - Ýuriý Gagariniň hem-de Fernand Magellanyň atlaryny hemişe ýatda saklarys. Biz geçmişi ýatlaman, geljege tarap hereket edip bilmeris"-diýip, Kamynin sözüniň üstüni ýetirdi.
