Apple wideo oýunlaryny döretmezden, oýun pudagynda gazanan girdejisi boýunça iň uly oýunçy boldy diýip, “The Wall Street Journal” neşiri habar berýär. 2019-njy ýylda kompaniýanyň oýunlardan gazanan girdejisi Microsoft, Nintendo, Activision we Sony kompaniýalarynyň bilelikdäki gazananyndan 2 mlrd dollar ýokary boldy diýip, kanobu.ru habar berýär.
Kupertinoly kompaniýa, aslynda, hiç hili oýun çykarmaýar. Ýöne kompaniýa App Store dükanynda pul gazanýar. Ýagny, Apple ol ýerde beýleki işläp düzüjileriň müňlerçe oýunlaryny satýar we her satuwdan 30% möçberinde komissiýa alýar.
Hasabata görä, Apple 2019-njy ýylda oýunlardan 8,5 mlrd dollar gazandy. 2020-nji ýylda Hytaýda işlenip düzülen App Store-de iň girdejili üç oýun kompaniýa 2,5 mlrd dollar getirdi. Şol ýylda ulanyjylar App Store dükanyndaky oýunlara 45 mlrd dollar sarp etdiler, onuň 31%-i Hytaýyň ulanyjylaryna, 26%-i ABŞ-nyň ulanyjylaryna degişli. Bu Apple kompaniýasyna 13,5 mlrd dollar ýa-da umumy girdejiniň (275 mlrd dollar) 5%-ini getirdi.
Şeýle-de, hasabatda oýunçylaryň, takmynan, 6%-iniň 2017-nji ýylda girdejiniň 88%-ini getirendigi bellenilýär. Ortaça, olar ýylda 750 dollar sarp etdiler, oýunçylaryň 1%-i bolsa adam başyna ortaça 2694 dollar sarp etdi.
2024-nji ýylda wideo oýunlaryndan gelýän global girdejiniň 198 mlrd dollara çenli ýokarlanmagyna garaşylýar. Olardan 103 mlrd dollar mobil oýunlarynyň paýyna düşer.
