Özbegistanda Goranmak ministrliginiň ýokary harby bilim edaralarynda (ÝHBE) daşary döwletleriň harby kadrlaryny taýýarlamak we okatmak ulgamy ornaşdyrylýar. Prezidentiň kararyna laýyklykda, ÝHBE-de daşary ýurtly harby kadrlar bilen işlemek boýunça bölümler döredilýär diýip, uz.sputniknews.ru habar berýär.
Daşary döwletleriň harby kadrlaryny taýýarlamak baglaşylan ikitaraplaýyn halkara şertnamalaryna laýyklykda, muzdsuz, ýeňillikli, şeýle-de tölegli esasda amala aşyrylýar. Daşary ýurtly harby kadrlary okatmak üçin ÝHBE-e kabul etmegiň ýyllyk kwotasy prezident tarapyndan goşmaça kwotalaryň çäginde kesgitlenýär.
Daşary ýurtly harby kadrlar ÝHBE-de okamaga giriş synaglary bolmazdan kabul edilýär. Okuw gündizki görnüşinde özbek we rus dillerinde ýokary harby bilimiň bilim maksatnamalary boýunça amal edilýär.
Okatmak bakalawriat, magistratura, harby we kliniki tejribe maksatnamalary hem-de beýlekiler boýunça amala aşyrylýar. Bilim alanlaryndan soň, daşary ýurtly harby kadrlara “leýtenant” harby ady we hünäri boýunça kategoriýa berilýär, kesgitlenen nusgada diplomlar we döşe dakylýan nyşanlar gowşurylýar.
Harby-lukmançylyk akademiýasynda bakalawriaty tamamlanlara “lukmançylyk gullugynyň leýtenanty” harby ady berilýär, “harby lukman” hünärini alandygy barada döwlet nusgasynda diplomlar gowşurylýar.
Dissertasiýa goran doktoranturanyň uçurymlary degişli dersler boýunça filosofiýa doktory (PhD) alymlyk derejesini alýarlar.
