Gruziýaly küştçi Nona Gaprindaşwili "Perziniň göçümi" (The Queen’s Gambit, 2020) mini-serialyndaky bir epizod üçin Netflix kompaniýasynyň üstünden ABŞ-nyň kazyýetine arz etdi. Bu barada küştçiniň bähbitlerini goraýan Gruziýanyň BLB aklawçylyk firmasynyň hyzmatdaşy Maýa Msariaşwilä salgylanyp, TASS habar berdi.
"Biz serial çykaly bäri bu kazyýet işiniň üstünde köp işledik. Onda 1968-nji ýyl bilen bagly epizodlaryň birinde teswirçi hiç wagt erkek küştçüler bilen oýnap görmedik küştçi zenan Nona Gaprindaşwiliniň bardygy aýdylýar" diýip, Msariaşwili belleýär.
Gaprindaşwiliniň tarapdarlary onuň 1968-nji ýyla çenli Dragolýub Welimirowiç, Swetozar Gligoriç, Boris Spasski we Mihail Tal ýaly 50-den gowrak erkek küştçi bilen oýnandygyny öňe sürýärler.
Gaprindaşwili Netflix-iň rus küştçisi diýip atlandyryp, ony hasam kemsidendigini nygtaýar. Ol öwezini dolmak üçin kompaniýadan 5 million dollar, şeýle hem serialdaky özüniň erkek küştçüler bilen oýnamandygy hakyndaky setiriň inkär edilmegini talap edýär.
Belläp geçsek, Gaprindaşwili 1941-nji ýylyň 3-nji maýynda Gruziýanyň Zugdidi şäherinde dünýä indi. Ol ilkinji gezek 1962-nji ýylda dünýä çempiony diýen ada eýe boldy, soň ýene dört gezek - 1965, 1969, 1972 we 1975-nji ýyllarda dünýäniň iň gowy küştçüsi boldy. Ol Bütindünýä küşt olimpiadalarynyň on bir gezek ýeňijisi, SSSR-iň hem bäş gezek çempionydyr. 1982-nji ýylda bolsa ol "Küşt Oskary" baýragyna mynasyp boldy.
