Facebook kompaniýasyna degişli bolan Instagram sosial ulgamy ýetginjek gyzlarda psihiki bozulmalaryň, şol sanda anoreksiýanyň güýçlenmegine we öz janyňa kast etmek pikirleriniň döremegine sebäp bolup bilýär. “The Wall Street Journal” gazetiniň habar bermegine görä, Facebook tarapyndan geçen ýyl şeýle netijä gelindi, ýöne degişli maglumatlar neşir edilmedi diýip, TASS belleýär.
Instagram-y görmek, takmynan, 40%-i 22 ýaşa çenli adamlar bolan käbir ulanyjylarda ýeterlik derejede özüne çekiji ýa-da baý bolmandyklary üçin kem bolmak duýgusyny döredýär. “Ýetginjek gyzlaryň 32%-i daşky keşbi sebäpli negatiw duýgulary başdan geçirýän bolsa, Instagram-yň bu duýgulary hasam güýçlendirendigini habar berýär” – diýlip, kompaniýanyň içerki tanyşdyrylyşynda aýdylýar, onuň bir bölegi gazet tarapyndan getirilýär. Instagram-y görüp, özüňi beýlekiler bilen deňeşdirmek, ýaş zenanlaryň özlerine we daşky keşplerine berýän bahasyny üýtgedýär.
Tanyşdyrylyşyň maglumatlaryna görä, ýetginjekler, köplenç, howsalanyň we depressiýanyň güýçlenmegini Instagram bilen baglanyşdyrýarlar. Beýik Britaniýada ulanyjylaryň 13%-i we ABŞ-da 6%-i Instagram-y görmegiň täsiri bilen öz janlaryna kast etmek pikirleriniň dörändigini habar berdi. Aýratynam, bu täsirler ýetginjek gyzlaryň we ýaş zenanlaryň arasynda ýaýrandyr.
Gazetiň bellemegine görä, Facebook bu meselelerden habarly bolsa-da, häzire çenli olary aradan aýyrmak üçin çäre görmedi we köpçülikleýin bildirişlerde hem olaryň ähmiýetini peseltmäge çalyşýar.
