Islandiýa howadan kömürturşy gazyny tutup almak boýunça dünýädäki iň uly gurluşy işe girizýär. Islandiýanyň Carbfix kompaniýasy tarapyndan Şweýsariýanyň Climeworks AG şereketi bilen bilelikde döredilen gurluş her ýyl 4 müň tonna çenli kömürturşy gazyny tutup bilýär, bu ýylda 790 töweregi awtoulagdan işlenen gazyň çykmagyna deňdir diýip, www.ng.ru habar berýär.
Zawod kömürturşy gazyny almak üçin ýokary tehnologiýaly süzgüçler we wentilýatorlar bilen sekiz sany uly gaby öz içine alýar. Kömürturşy gazy gyzgyn suw bilen garylýar we ýeriň aşagyna iberilýär, şol ýerde ol daş jynslary bilen täsirleşip, kem-kemden gataýar. Gurluş ýakynda ýerleşdirilen geotermiki çeşmeleriň ulanylmagyndan alynýan elektrik energiýasy bilen işleýär.
Halkara energetika agentliginiň (HEA) maglumatlary boýunça, häzirki wagtda dünýäde howadaky kömürturşy gazyny göni tutmak boýunça umumy kuwwaty ýylda 9 müň tonna bolan 15 gurluş hereket edýär.
Occidental Petroleum amerikan nebit kompaniýasy häzirki wagtda her ýylda 1 mln tonna çenli kömürturşy gazyny tutup biljek iň güýçli zawody döredýär.
HEA-nyň maglumatlaryna görä, geçen ýyl global kömürturşy gaz zyňyndylary 31,5 mlrd tonna boldy.
