Özbegistan Respublikasynyň paýtagtynda Söwda-ykdysady, ylmy-tehniki we medeni hyzmatdaşlyk boýunça bilelikdäki hökümetara türkmen-özbek toparynyň on altynjy mejlisi geçirildi. Oňa türkmen tarapyndan Ministrler Kabinetiniň Başlygynyň orunbasary E.Orazgeldiýewiň ýolbaşçylygynda Türkmenistanyň ministrlikleriniň we pudaklaýyn edaralarynyň ýolbaşçylary gatnaşdylar.
mfa.gov.tm saýtynda habar berlişi ýaly, özbek wekiliýetine Özbegistan Respublikasynyň Premýer-ministriniň orunbasary, maýa goýumlar we daşary söwda ministri S.Umurzakow ýolbaşçylyk etdi. Gatnaşyjylar toparyň on bäşinji mejlisiniň kararlarynyň durmuşa geçirilişi boýunça bilelikdäki işleriň depginini ara alyp maslahatlaşdylar.
Mejlisiň dowamynda söwda-ykdysady hem-de senagat ulgamyndaky özara hereketleri giňeltmegiň, energetika, ulag we üstaşyr daşamak ugurlary boýunça ikitaraplaýyn gatnaşyklary pugtalandyrmagyň meseleleri boýunça pikir alşyldy. Oba hojalygy, hususan-da sebitiň suw serişdelerini ulanmak ulgamyndaky hyzmatdaşlyk gepleşikleriň esasyny düzdi.
Bilelikdäki hökümetara toparyň işiniň jemleri boýunça degişli Teswirnama gol çekildi.
