14-nji sentýabrda (sişenbe güni) Nýu-Ýork şäherinde BMG-niň Baş Assambleýasynyň 76-njy sessiýasy öz işine başlady.
Çäräniň başynda guramanyň Baş sekretary Antoniu Guterriş we BMG-niň Baş Assambleýasynyň täze baştutany, Maldiwleriň wekili Abdullah Şahid çykyş etdi. Öz çykyşynda Antoniu Guterriş dawa-jenjeli bes etmäge we koronawirusa garşy göreşe ünsi jemlemäge çagyrdy.
"Pandemiýa ýaşaýşa, durmuş şertlerine we geljege howp salmagyny dowam etdirýär. Biz birleşsek, bu kynçylyklary we bölünişikleri üýtgedip bileris. Eger öz işimiziň daşynda jem bolsak, multilateralizm ruhunyň daşyna jemlensek, onda muny amala aşyryp bileris" diýip, TASS Guterrişiň sözlerini getirýär.
Abdylla Şahid hem öz gezeginde Baş Assambleýanyň nobatdaky maslahatynda serediljek esasy mowzuklar hakynda durup geçdi.
"Men COVID-19-dan soň dünýäni dikeltmegiň çäklerinde ünsümi ählumumy sanjymlarda jemleýärin. Biz hökmany suratda sanjym boşlugyny ýapmalydyrys" diýip, diplomat aýtdy.
Şu hepde maslahatyň ilkinji mejlisleri resmi häsiýete eýe bolar. Sammite gatnaşyjylar gün tertibini we iş guramalarynyň täze düzümini tassyklarlar. 21-nji sentýabrda bolsa BMG-niň Baş Assambleýasynyň ýokary derejeli hepdesi başlar. Birnäçe ýurduň ýolbaşçylary, hökümet baştutanlary we ministrleri ABŞ-a ýygnanarlar.
