Angliýanyň «Mançester Ýunaýted» klubunyň portugaliýaly futbolçysy Kriştianu Ronaldu Çempionlar ligasyndaky oýunlarynyň sany boýunça rekordy gaýtalady.
Sişenbe güni 36 ýaşly oýunçy toparlaýyn tapgyryň Şweýsariýanyň “Ýang Boýz” toparyna garşy birinji tapgyr oýnunda esasy düzümde meýdança çykdy, bu oýun onuň üçin Çempionlar ligasynda 177-nji boldy. Ronaldu 13-nji minutda hasaby açmak bilen, ýaryşda 135-nji goluny girizdi. Bu görkeziji boýunça ol ýeke-täk rekord eýesidir. Ýewropanyň esasy ýaryşynda geçiren oýunlarynyň sany boýunça ol Ispaniýanyň “Real” we Portugaliýanyň “Portu” toparynyň öňki derwezebany Iker Kasilýas bilen deňleşdi diýip, TASS belleýär.
Belläp geçsek, bu duşuşyk Şweýsariýanyň klubunyň peýdasyna 2:1 hasabynda tamamlandy. Ýeňiş goluny oýnuň ikinji ýarymynyň goşmaça bäşinji minutynda Teozon-Žordan Sibaço girizdi.
Şeýle-de, portugaliýaly oýunçy taryhda bassyr 16 möwsüm Çempionlar ligasynda gol girizen üçünji oýunçy boldy. Öň bu fransiýaly Karim Benzema we argentinaly Lionel Messä başardypdy.
F toparçasynyň indiki oýnunda 29-njy sentýabrda “Mançester Ýunaýted” Ispaniýanyň “Wilýarreal” toparyny kabul eder. “Ýang Boýz” bolsa şol gün myhmançylykda Italiýanyň “Atalanta” topary bilen oýnar.
