Müsüriň häkimiýetleri geljek birnäçe aýda iki sany täze syýahatçylyk şäherini açmagy meýilleşdirýärler. Bu barada Müsüriň syýahatçylyk we gadymy ýadygärlikler ministri Haled al-Anani “Izwestiýa” gazetine beren interwýusynda aýtdy diýip, www.belta.by habar berýär.
“Öňümizdäki birnäçe aýyň dowamynda biz iki sany düýbünden täze syýahatçylyk şäherini açmagy meýilleşdirýäris. Bir şäher Kairden, takmynan, 100 km demirgazykda Gyzyl deňze golaý ýerleşer. Ol Al-Galýalýa diýlip atlandyrylýar. Birnäçe aýdan soň Aleksandriýa golaýda Ortaýer deňziniň kenarýakasynda Al-Alamin diýlip atlandyrylýan täze şäheri açarys” – diýip, Müsüriň Syýahatçylyk ministri aýtdy.
Ministr meşhur şypahanalardan başga-da, Müsürde köp sanly syýahatçylary kabul edýän belli syýahatçylyk şäherleriniň bardygyny ýatlap geçdi. “Mundan başga-da, biziň örän meşhur syýahatçylyk şäherlerimiz bar: Marsa-el-Alam, Taba, Nuweýba, Safaga. Bu şäherler köp sanly syýahatçylary kabul edýärler. Biz bu syýahatçylyk zolaklaryny we şäherlerini dürli usullar: arzan awialiniýalar, uçuş maksatnamalary, ýokary tizlikli ýollar, demir ýollar bilen birleşdirmegi meýilleşdirýäris. Biziň esasy maksadymyz syýahatçylara bu şäherlere birnäçe gezek baryp görmäge mümkinçilik döretmekdir” – diýip, Haled al-Anani belleýär.
Syýahatçylyk ministri ýakyn wagtda ýurda awiapetekleriň bahasynyň üýtgemejekdigini aýtdy we Müsüriň häkimiýetleriniň beýleki döwletlerden gelýän uçarlary goldamagy dowam etdirjekdigini belledi.
