Hytaýda aşa köp işlemegiň ýakyn geljekde resmi taýdan gadagan edilmegine garaşylýar. Bu barada Hytaýyň Ýokary Kazyýetiniň Kararyna salgylanyp, ferra.ru habar berýär.
Hytaýda uzak wagtlardan bäri "996" zähmet düzgüni hereket edip gelýär. Ol hepdede 6 gün irden 9-dan agşam 9-a çenli işlemegi aňladýar. Hytaýly telekeçileriň köpüsi entegem şu düzgüne eýerýärler. Emma Hytaý Halk Respublikasynyň kanunlaryny bozýan yzygiderli artykmaç işlemek bilen baglanyşykly dawa-jenjellerden soň ýurtda bu zähmet düzgüni tankytlanyp başlandy.
Çeşmäniň habaryna görä, Hytaýyň Ýokary kazyýeti "996" zähmet medeniýetini resmi taýdan ýazgardy. "Soňky döwürde jemgyýet käbir pudaklarda çenden aşa artyk işlenilmegine aýratyn üns berdi" diýlip, Kazyýetiň kararynda aýdylýar. Kararyň başga bir ýerinde bolsa: "Iş berijiler iş wagtynyň milli ulgamyna boýun bolmaly" -diýlip, beýan edilýär.
Şeýlelikde, bu Kararyň ýakyn wagtlarda güýje girmegine garaşylýar. Ýöne munuň haçan boljakdygy we ony ýerine ýetirmeýänlere nähili çäreleriň görüljekdigi häzirlikçe nämälim bolmagynda galýar.
