Khazar Exploration and Production (KEPCO) eýran kompaniýasy Hazar deňziniň eýran böleginden ýurduň iň iri tebigy gaz ýatagynyň üstüni açandygyny habar berdi diýip, az.sputniknews.ru habar berýär.
KEPCO-nyň baş ýerine ýetiriji direktory Ali Osuliniň aýtmagyna görä, «Çalus» ýatagynyň gory «Günorta Pars» ägirt uly gaz käniniň dörtden bir ekwiwalentine ýa-da onuň 11 sany fazasyna barabardyr — bu bolsa 3,4 trillion kub metr gaza deňdir.
Şol bir wagtda bellenilişi ýaly, «Günorta Pars» käniniň gory 14,2 trillion kub metr gaz ätiýaçlyklaryna, 18 milliard barrel gaz kondensatyna deňdir. Bu bolsa Eýranyň umumy bahalandyrylýan gaz ätiýaçlyklarynyň 40%-ne — 33,8 trillion kub metre barabar.
Eýranyň habar beriş serişdeleriniň bellemegine görä, «Çalus» ýatagyndaky başlangyç bahalandyryş işleriniň netijelerine görä, bu ýatagyň tebigy gazy Ýewropanyň gaza bolan isleginiň 20%-ni üpjün etmäge ýeter.
