2021-nji ýylyň birinji çärýeginde Türkmenistan Owganystanyň iri söwda hyzmatdaşlarynyň ilkinji onlugyna girdi. Ýurdumyzdan ugradylan harytlaryň 70 göterime golaýy nebitgaz toplumynyň önümleridir. Olaryň umumy bahasy ABŞ-nyň 64 million dollaryna golaý boldy. Bu barada Owganystanyň Milli statistika we habarlar müdirligi (NSIA) käbir maglumatlary ýetirýär.
Hususan-da, şu ýylyň ilkinji üç aýynda Türkmenistandan Owganystana A-80 benziniň 8 müň tonna golaýy hem-de awtoulag benzininiň beýleki görnüşleriniň 45 müň tonnadan gowragy, şeýle hem suwuklandyrylan gazyň 40 müň tonna golaýy ugradyldy.
Geçen ýylyň şol döwri bilen deňeşdirilende, iberilen dizel ýangyjynyň möçberi ep-esli artyp, 28 müň tonnadan gowrak boldy. Mundan başga-da, owgan işewürleri tehniki nebit ýaglaryny, polietilen, polipropilen, propan we beýleki önümleri satyn aldylar.
