Pandemiýa sebäpli dowamly ýapylan Türkiýäniň Antalýa şäherindäki myhmanhanalar işini dikeltmäge taýýarlanýar. Ýurduň syýahatçylyk pudagyna koronawirus ýokanjy aýratyn güýçli täsirini ýetirdi. 2019-njy ýylda Türkiýede syýahatçylaryň 43 milliona golaýy bolup, pudagyň girdejisi 34,5 milliard dollara barabar boldy. Bir ýyl soňra bolsa bu ýurda gelýänleriň sany 70 göterime çenli aşak düşdi. Bu barada euronews.com maglumat berýär.
«Biz eýýäm 20 aý bäri ýapyk. Russiýadan Türkiýä uçuşlara çäklendirmäniň aýrylmagy bizi örän begendirdi. Çünki biziň myhmanhanalarymyza yzygiderli gelýänleriň 70-80 göterimi russiýaly syýahatçylar. Eger-de Ýewropa ýuwaş-ýuwaşdan çäklendirmeleri aýyrsa, şu ýylyň syýahatçylyk möwsümini bolmanda bölekleýin dikeldip bolar» diýip, myhmanhanalaryň biriniň dolandyryjysy Murat Ozbolat aýdýar.
Türkiýäniň Syýahatçylyk ministrliginiň maglumatlaryna görä, iki ýyl mundan ozal ýurda 43 milliona golaý adam syýahata geldi. Olaryň iň köpi — 6,9 milliony Russiýadan, 4,8 milliony bolsa Germaniýadan gelen syýahatçylardyr.
Şeýle-de bolsa, Beýik Britaniýa we Fransiýa Türkiýäni gyzyl sanawa goşup, bu ýurtdan gelýänlere 7 günläp karantinde bolmagy talap edýär. Şoňa görä-de, Türkiýe ýene-de bir syýahatçylyk möwsümini elden gidermekden uly ätiýaç edýär.
