Russiýanyň «Gazprom» kompaniýasy 2021-nji ýylyň birinji çärýeginde Türkmenistandan satyn alýan tebigy gazynyň möçberini 2,2 mlrd kub metre çenli artdyrdy. 2020-nji ýylyň degişli döwründe bu görkeziji 1,3 mlrd kub metre barabardy. Bu barada «Gazpromyň» ýewroobligasiýalarynyň täze neşirindäki hasabatyna we memorandumyna salgylanyp, Interfaks habar berýär.
Geçen ýylda rus kompaniýasy Türkmenistandan 4,7 mlrd kub metr tebigy gaz satyn aldy.
Belläp geçsek, «Gazprom» 2019-njy ýylyň aprel aýynda türkmen gazyny satyn almaklygyny dikeltdi. Şol wagt 15-nji aprelden 30-njy iýun aralygyndaky gysga möhletli şertnamanyň çäginde ibermeleriň möçberi 1,2 mlrd kub metr gaza barabar boldy.
2019-njy ýylyň 1-nji iýulynda «Gazprom» kompaniýalary topary türkmen tebigy gazyny satyn almak hakynda «Türkmengaz» döwlet konserni bilen bäş ýyllyk — 2024-nji ýylyň 30-njy iýunyna çenli ylalaşyk baglanyşdy.
