Şu ýylyň güýzünde köp sanly üýtgeşmeli we funksiýaly Android 12-niň resmi goýberilişiniň bolmagyna garaşylýar. Şol bir wagtda Google eýýämden hemme Android gurluşlar üçin niýetlenen täze funksiýalaryň birnäçesini paýlaşýar. hi-tech.mail.ru olar barada käbir maglumatlary ýetirýär.
Öz çatlarynda goşmaça sahypalara has gowy gözegçilik etmek isleýän adamlar üçin Google özüniň Google Messages mobil goşundysynda aýratyn SMS-leri bellemek mümkinçiligini goşýar. Haçan-da siz SMS habaryny ýyldyzjyk bilen belläniňizde, ol aýratyn bölümde peýda bolar. Şonuň üçin-de indi size her gezek saklap galmak islän anyk suratyňyzy ýa-da salgyňyzy gözlemek üçin tutuş çatyňyzy ýeke-ýekeden geçirip oturmagyň zerurlygy ýok. Google ýyldyzjykly SMS habarlarynyň golaýdaky hepdelerde hemme ulanyjylaryň arasynda ýaýradylyp başlajakdygyny habar berdi.
Täzelenen Android Auto mobil goşundysy bolsa sürüjilere hatda ulaglaryny sürüp barýan wagtynda-da Android-yň esasy mümkinçiliklerinden peýdalanmaga şert döreder.
Şeýle-de Google ýertitremelerini habar berýän ulgamyna Türkiýe, Filippinler, Gazagystan, Gyrgyzystan, Täjigistan, Türkmenistan we Özbegistan ýaly käbir ýurtlary goşup, onuň mümkinçiliklerini giňeltdi. Ýertitremesi bolan ýagdaýynda, Google ulanyjylara onuň öz sebitine haçan gelip ýetjekdigini öňünden habar berer. Biz bu baradaky giňişleýin habary saýtymyzyň okyjylaryna ozal hem ýetiripdik.
Gboard-da Emoji Kitchen ulgamynyň peýda bolmagy bilen, ýazylan zatlaryň manysy bilen gabat gelýän smaýlikleri saýlamaga mümkinçilik dörär. Ýöne bu täzelik entek diňe iňlis, ispan we portugal dillerindäki klawiaturaly Android 6 we ondan ýokary ulgamdaky smartfonlar üçin göz öňünde tutulandyr.
