Tesla amerikan kompaniýasy Kaliforniýa ştatynyň Frimont şäherinde özüniň täze Model S Plaid elektromobilini görkezdi. Teslanyň ýolbaşçysy Ilon Maskyň alyp barmagynda geçirilen tanyşdyrylyş dabarasy kompaniýanyň saýtynda görkezildi. Bu barada TASS habar berýär.
Telekeçiniň belleýşi ýaly, tankytçylar öň Model S awtomobiliniň täzelenen wersiýasynyň “örän çalt” boljakdygyna ünsi çekip, şeýle ulaglary çykarmagyň zerurlygyna şübhe bildirdiler. Maskyň aýtmagyna görä, Model S Plaid-iň işlenip düzülmegi durnukly energetikanyň geljegi üçin diýseň möhüm boldy.
Kompaniýa Model S Plaid-iň köpçülikleýin öndürilýän iň çalt awtomobil boljakdygyny belleýär. “Model S Plaid islendik sport awtomobilinden, islendik Porsche-den has çalt we şol bir wagtyň özünde islendik Volvo-dan has howpsuz awtoulagdyr” – diýip, Mask aýdýar. Model S Plaid iki sekuntdan az wagtyň içinde sagatda 96,5 kilometre çenli bat alyp bilýär. Elektromobiliň iň ýokary tizligi sagatda 320 kilometrden geçýär. Awtomobil zarýad bermezden 620 kilometrden gowrak ýoly geçip bilýär.
Mask 25 sany Model S Plaid awtomobiliniň müşderilere eýýäm iberilýändigini belledi. Hepdäniň dowamynda bu awtoulaglardan ýene-de ýüzlerçesini ýola goýmak meýilleşdirilýär.
