"Ýewrowideniýe" halkara aýdym-saz bäsleşigi, COVID-19 pandemiýasyna garamazdan, 2021-nji ýylda geçiriler diýip, ýaryşyň teswirleýjisi Graham Norton aýtdy. Bu barada mybryansk.ru habar berdi.
Norton BBC News bilen söhbetdeşlikde aýdym-saz bäsleşiginiň adaty formatda geçiriljekdigini aýtdy. Ýekeje täzelik - eger-de bäsleşige gatnaşyjy onuň geçirilýän ýeri bolan Rotterdam şäherine baryp bilmese ýa-da koronawirus ýokançlygy sebäpli karantinde galmaga mejbur bolsa, onda bäsleşikde aýdymyň ýazgysy görkeziler.
Graham Norton "Ýewrowideniýe" aýdym-saz bäsleşiginiň 2021-nji ýylda bolmalysy ýaly geçiriljekdigine ynam bildirip, bu çärä 20 müňe golaý tomaşaçynyň gatnaşmagyna garaşylýandygyny aýtdy. Bäsleşigiň jemleýji tapgyry, mälim bolşy ýaly, 22-nji maýda Gollandiýanyň Rotterdam şäherinde geçiriler.
