Dünýä aýdym-saz giňişliginde iň iri sylag hökmünde görülýän «Gremmi» baýragynyň gowşurylyş dabarasy global pandemiýa zerarly yza süýşürildi. Bu barada sişenbe güni «Rolling Stone» žurnalyna salgylanyp, TASS habar berdi. Dabarany 14-nji martda geçirmek meýilleşdirilýär.
63-nji «Gremmi» baýraklarynyň gowşurylyş dabarasyny ilkibaşda 31-nji ýanwarda geçirmek meýilleşdirilipdi. Şeýle-de bolsa, neşiriň habaryna görä, Kaliforniýada täze görnüşli koronawirusyň ýaýramagy zerarly ýagdaýyň ýaramazlaşmagy bilen baglylykda guramaçylar ony yza süýşürmek kararyna geldiler.
Noýabr aýynyň ahyrynda guramaçylar aýdym-saz baýragyna 84 ugur boýunça dalaşgärleriň sanawyny yglan etdiler.
9 kategoriýada 63-nji «Gremmi» baýraklaryna dalaşgär görkezilen amerikaly pop ýyldyzy Beýons «Gremmi»-niň taryhynda iň köp dalaşgär görkezilen zenan diýlip bellenildi. Teýlor Swift, Roddi Riç we Dua Lipa baýraga 6 kategoriýa boýunça dalaşgärlik edýärler.
