"Barselona" Ispaniýanyň çempionatynyň 7-nji tapgyrynda madridli "Realy" kabul etdi. “Kamp Nou” stadionynda geçen duşuşyk madridlileriň 3:1 hasabyndaky ýeňşi bilen tamamlandy.
Hasap duşuşygyň eýýäm bäşinji minudynda açyldy. Karim Benzemanyň başlan hüjümi Federiko Walwerdeniň goly bilen tamamlanyp, "Realy" bada-bat öňe saýlady. Bary-ýogy üç minutdan soň gök-narynçlar hasaby deňlediler. Goluň awtory ýaş Ansu Fati boldy. Fati häzirki wagtda el-klasikoda iň köp gol geçiren iň ýaş oýunçy bolup durýar.
Duşuşygyň ikinji ýarymda Zinedin Zidanyň şägirtleri öňe saýlandy. Klement Langleniň jerime meýdançasynyň içinde düzgüni bozmagy bilen, 63-nji minutda "Barselonanyň" derwezesine 11 metrlik jerime urgusy bellenildi. Jerime urgyny Serhio Ramos dürs ýerine ýetirip, hasaby 1:2-ä çykardy. Duşuşygy eminiň jürlewüginden ozal Luka Modriçiň goly jemledi diýmek bolar. Modriçiň hasaby 1:3-e ýetirmegi bilen duşuşygyň ýeňijisi has aýdyň boldy. Oýundan ozal duşuşygyň öňdebaryjysy hasaplanan "Barselona" Ronald Kumanyň tälimçiligindäki ilkinji el-klasikosyny, şeýdip, şowsuz tamamlady. Oňa derek Zinedin Zidan "yrgyldap duran" tälimçilik kürsüsini has-da "berkitdi".
Şeýlelikde, Real Madrid 13 utuk toplap, Ispaniýanyň çempionatynyň tablisasynda birinji ýeri eýeledi. Barselona bolsa 7 utuk bilen 10-njy ýerde.
