ABŞ-nyň Prezidenti Donald Trampyň ýurtda täze koronawirus pandemiýasy sebäpli ähli ýaşaýjylaryň gorag maskalaryny geýmelidigi barada düzgün girizmek niýeti ýok. Ol muny "Fox News" gazetine beren interwýusynda aýtdy, diýip, tass.ru habar berýär.
Trampa ýurduň ähli ýaşaýjylaryndan maska geýmegi talap edýän karar çykarylarmyka diýlen sowal bilen ýüzlenildi. Ol: "Ýok, men adamlaryň doly erkin bolmagyny isleýärin" – diýip jogap berdi. Soňra ol munuň zerurdygyna ynanmaýandygyny aýdyp, sözüniň üstüni ýetirdi.
"Onsoňam, men her kim maska geýen bolsa, bularyň bary ýitip giderdi diýilmegi bilen ylalaşmaýaryn" - diýip, prezident şeýle çäräniň birnäçe hepdäniň içinde wirusyň ýaýramagyny düýpli haýallatjakdygy bilen bagly beýannama hakyndaky pikirini mälim etdi. Şeýle hem ol gorag maskasyny geýmegiň peýdaly-da bolsa, käbir ýaramaz netijelere hem getirip biljekdigini belläp geçdi.
Amerikan lideri, köplenç köpçülikleýin çärelere maskasyz gatnaşýandygy üçin birnäçe gezek tankyt edilipdi. Syýasy garşydaşlary Trampyň raýatlar üçin ýaramaz görelde görkezýändigini öňe sürýärler. Döwlet baştutany ABŞ-nyň ähli ýaşaýjylarynyň maska geýmelidigine ozal hem şübhe bildiripdi.
